خرجت نجوى الزيادي، الناجية الوحيدة من جريمة نبروه المأساوية، عن صمتها بعد خروجها من مستشفى الطوارئ وعودتها إلى منزلها، لتكشف في بث مباشر على “فيسبوك” كواليس جديدة عن الليلة التي شهدت مقتل الأطفال الثلاثة على يد والدهم.

قالت نجوى بصوت يملؤه الألم:

> “أنا فيّا وجع كبير من يوم اللي حصل، بحلم بكوابيس، مش متخيلة إن العيال راحوا مني، كانوا بالنسبالي عيالي بجد، يا رب صبرني. كل يوم بحلم بعصام إنه بيموتني، كل شوية.”

وأضافت باكية:

> “مكنش ينفع أكمل معاه، كان لازم أطلق، اتحملت كتير. لما طلبت الطلاق ده حقي، من حقي أعيش حياتي اللي أنا اختارها. أنا تعبت، ومش عايزة حد يظلمني ويقول لي إنتِ السبب. هو أنا مش من حقي أطلب الطلاق؟ مش ربنا حلله؟ العلاقة بيني وبين عصام وصلت لمرحلة مستحيلة، خلاص ماكنش ينفع أكمل.”

وتابعت نجوى حديثها عن تفاصيل حياتها مع الجاني قائلةً:

> “أنا اتجوزته عشان العيال، كنت مبسوطة ومرتاحه، المحل بتاعي مكفيني ومش محتاجة حاجة. اتجوزته عشان خاطرهم، كانوا يتامى وصعبانين عليا، قلت هم زي أولادي. ما كنتش محتاجة منه فلوس ولا حاجة. ورثت من أبويا، ولما كنت هعمل جمعية قبل ما أخد الورث، قال لي هديكي 60 ألف جنيه وبلاش تعملي جمعية، وبعد ما أخدت الورث سدتهم له.”

ثم أضافت بحزن:

> “الناس ما تحكمش عليا، ما تجيش تقولي كمّلي معاه. كنت خلاص تعبت، ما كانش ينفع أكمل.”

وكانت التحقيقات قد كشفت أن الجاني عصام طعن زوجته عدة طعنات بعد تهديدها المستمر له بالطلاق، قبل أن يُقدم على قتل أطفاله الثلاثة: مريم، ومحمد، ومعاذ، ثم أنهى حياته في واقعة هزّت أرجاء مدينة نبروه بمحافظة الدقهلية.

الجريمة تركت وراءها مأساة إنسانية مؤلمة، وصدمة عميقة في المجتمع المصري، وسط دعوات واسعة بمحاسبة من يتغاضى عن إشارات العنف الأسري قبل أن تتحول إلى جرائم دامية

| فيسبوك | واتساب | لينكد ان