شهدت قرية كفر شبين التابعة لمركز شبين القناطر بمحافظة القليوبية، واقعة مأسوية بعدما قُتل السائق حامد أحمد زايد إثر تلقيه طعنة نافذة من أحد الأشخاص أثناء تدخله لفض مشاجرة بين أقاربه وأحد اللصوص.

وقالت زوجة الضحية في تصريحاتها: "في اليوم اللي حصلت فيه الواقعة كان جوزي بيتفرج على فرح من فوق السطح، وهو نازل شاف أولاد عمه بيجروا، فاتصل بابن عمه اللي قال له إنهم مسكوا حرامي."

وأضافت: "نزل يشوف إيه اللي بيحصل، ولما لقى أولاد عمه ماسكين الولد حاولوا يعملوا جلسة عرفية بدل ما يسلموه للشرطة، لكن أخو الولد جه ومعاه شباب واعتدوا بالسب والشتم، وفجأة الولد ضرب جوزي بمطواة في بطنه."

وتابعت الزوجة: "جوزي اتنقل مستشفى الجامعة ببنها وعملوا له عملية بسبب الطعنة اللي قطعت الأمعاء والشريان، لكنه عاش 8 أيام يتألم لحد ما توفى."

كما أكدت أن الجناة حاولوا تلفيق محضر كاذب ضد زوجها للتهرب من الجريمة، موضحة: "جوزي كان معروف عنه الطيبة وما لهوش في المشاكل، لكن للأسف اتقتل ظلم."

واختتمت الزوجة حديثها بمطالبتها بالعدالة: "أنا عايزة القصاص العادل.. جوزي مات وولادي اتيتموا ومفيش حد يقف معانا."